天气劲闷热，个天越嚟越反常。晏昼大战不名蜂，挨晚去狗肉档攞狗牙返办公室镇邪。
今日啲天气鬼咁闷热，怕且就嚟落大雨嘅节奏，通常啲水落唔出就会闷热到飞起。讲真啊，今年嘅天气都几反常下，往年三、四月份潮湿到窗都唔敢开的，结果今年冇乜感觉，而家都五月中咯，雨水都唔多滴。
今年村长仲喺群度呼吁大家节约用水，话秦皇水库就嚟干咁滞。哩嗰村长又真喺冇吹水，果排的确喺网上睇到好多水库都快干嘅新闻。
今日晏昼房间飞咗只好鬼大只嘅蜂（唔知乜品种，黄色嘅）入嚟，本嚟我唔多想理佢的，心谂只嘢应该一阵就会喺窗度飞返出去。点知等咗成排都唔见佢飞走，但又成日喺度飞嚟飞去，烦都算喇，喂，大佬啊，你咁样中嚟中去我好惊嘎，畀你针嘢我仲得掂嘅？于是忍冇可忍拧个电蚊拍去做佢世界，哇，你都冇讲，只嘢电咗好耐都唔得死嘅。最后都唔知电晕定喺电鬼死咗，确认咗几次佢唔喐啦我先敢用纸巾包住佢，然后抌落个马桶度冲鬼走咗。
挨晚返工时经过狗肉档时攞咗两只狗牙，之前过嚟食狗肉时特登叫老板留嘅。旧阵时我喺一啲都唔信哩家嘢嘅，而家唔知喺咪因为心态随住年纪越嚟越大而改变，发觉自己旧时接受唔到嘅嘢都变得好似冇乜所谓咁。有啲甚至开始选择相信，认真神奇。
前排搬咗办公室之后硬喺觉得周身唔聚财咁，听讲狗牙够杀气，就攞两只返嚟放办公室，镇一镇佢。
