今日锻炼时右膝关节有啲隐隐作痛，要注意下咯。今日抽血复检，结果还算满意，虽然仲有啲超标，但整体降咗好多，仍需努力。今年嘅单位嘅运动员举办得唔错，拔河比赛我哋队再次夺冠，哩啲就叫实力，鬼叫我哋大只佬多。
今日喺单位嘅工会运动会，亦都喺我复检三酯嘅日子，所以老婆帮手挂号时就尽量帮我靠前预约。
复检好顺利，准时就诊，简单咁开咗张抽血嘅单，然后抽完血就可以走得咯。不过次次嚟哩间医院抽血检查，啲姑娘都会认真咁问多两次我嘅名字，然后解释原因。因为我同本院一名妇科主任医师条名一模一样，查实我十几年前就知道啦，嗰阵时好似喺因为 Anne 生孖吉，我过嚟探佢时喺墙上见到同我同名嘅医生相。
抽完血我睇咗下时间，时间尚早，于是就上咗三楼牙科咨询咗一下。之前喺网上睇到一啲文章话以后嘅牙科诊所会无法生存，因为公立医院嘅牙科可以报销好多项目，而且收费比私人嘅便宜。结果今日过嚟一咨询，发现网上好多文章都喺鸠嗡多过呼吸，咨询台嘅护士姑娘话镶牙，洗牙都冇得报销。我问咗下洗牙嘅价钱，比私人诊所贵好多下啰。
因为抽咗血，所以我赶去运动会前喺体育馆旁食咗个净云吞，味道好一般，怀念以前喺乡镇政府对面嗰间早餐档度食嘅云吞，得闲带屋企人返落去回味一下先得。
入到体育馆时刚好碰上大合照，影完大合照后运动会就正式开始咯。我原本要参加拔河比赛嘅，但因为我今日抽咗血，所以内勤好心叫另一个同事替我。
每年运动员嘅高潮部分都喺拔河比赛，大家一齐呐喊助威，好容易就带动起会场上嘅气氛。今年嘅拔河比赛最终依旧喺我哋队胜出，冇办法，大只佬多。
拔河比赛完后领导上台讲咗几句同颁完奖之后大家就散场咯，总体嚟讲哩次运动会举办得比较成功。
因为一直落雨嘅原因，下昼喺屋企简单咁跑咗五公里就完成今日嘅锻炼。今日跑时发觉右腿膝关节有啲隐隐作痛嘅感觉，睇嚟要注意下先得。
复检结果：三酯降咗好多，虽然仲喺超咗标准线啲啲，但相较上次体检时超十倍嘅值顺眼咗好多。但尿酸相比上次升咗啲，超咗一百，仍需努力。