两只化骨龙好听话，主动学习，值得表扬。晏昼煮餸时用洋葱搭配娃娃菜，恶食到亖，直接倒嗮落垃圾桶。小组新嚟咗个认真恶搅嘅伙记，唉，呢镬认真捉虫。
连续两日两只化骨龙都能够主动噉喺「国家中小学智慧教育平台」度进行自学，值得表扬。由于学习过程中要望住个电子屏幕，所以我要求佢哋每隔半个钟就要停低，出阳台度望下远方嘅山或者楼下嘅花园。
晏昼落厨时搞咗个洋葱同娃娃菜嘅搭配，劲难食。一兜就出水，我食咗两旧就成碟倒咗落垃圾桶。后嚟老婆话洋葱同娃娃菜都只係适合做配菜，一齐搭埋做主菜嘅话就会不伦不类。只可以安慰自己，「经一事长一智」。
呢排小组嚟咗个后生仔，一开始佢係上日班嘅，然后领导揾我倾，话呢期夜班嘅工作繁重咗好多，佢想安排多个伙记畀我。我心谂多个人帮手做嘢肯定好㗎，就应承咗。而家先发现自己呢镬认真捉虫，新嚟条友恶搅到亖，第一日上班就成只发瘟鸡噉，喺出面企住都好似想沓交噉，于是我就问佢係咪病咗，佢话自己训唔到觉。然后我以为佢係因为生物钟未调得过嚟啦，点知第二日仲係咁，两只黑眼圈劲到鬼噉。继续揾佢倾，佢话已经两、三日冇训过好觉，训唔着。噉嘅情况我就叫佢去睇下医生，大佬啊，带佢你出去做嘢，突然间晕鬼咗就麻鬼烦。第三日开始条友一上班就开始训，我以为佢食咗药，心谂佢难得训着，就由佢。
快落班时之前同条友喺日班共事过嘅同事就同我讲，你冇畀佢呃咗，条友奸到亖，佢边係有病啊，佢就係落班之后玩游戏玩到唔愿训，挨到人唔人，鬼唔似鬼，然后返嚟上班就好似发瘟鸡噉。
我顶，咁紧要？经过呢两、三日观察，果然如此。而家条友仲离谱，日日迟到，上班就训，喺办公室就训 sofa，而家出车我就拍醒佢，点知佢坐车都训着。今晚有个同事特登叫埋佢一齐玩王者，然后条友鬼打都冇咁精神。哇，离谱到啊，先二十四、五岁人，玩游戏玩到自己人唔人鬼唔鬼噉。于是我又揾佢倾，但都係唔敢严厉噉话佢，毕竟条友孤僻到亖，性格又内向，太严厉嘅话怕条友谂埋一边。
唉，总之呢镬濑嗮嘢。