可能係因为距离嘅关系，同老豆嘅关系有所缓和。呢两日唔知係咪因为辣椒酱食多咗定饮咗普洱生茶，成日肚屙。运动要适量控制，坚持先会胜利。
今日两只老嘢喺乡下返咗上嚟，自从暑假开始，老豆叫接咗老妈返乡下，陪佢一齐打造佢哋嘅菜园。
讲真，虽然平时唔多认同老豆，觉得佢死牛一面颈，固执到亖。但佢真係勤力，我觉得佢有嘢做时身体都好啲，总之就係劳碌命。冇嘢做时佢成日都谂埋一边，仲要散播负能量。自从佢返咗乡下搞菜园之后，屋企和谐咗好多。有时候就係咁衰，以前老豆喺屋企时自己一日到黑同佢吵交，而家佢返乡下后有咗空间反而相处得好咗。
呢两日唔知係咪因为辣椒酱食得多咗定係饮咗啲普洱生茶，成日肚屙，踎到我脚仔软。查实按道理嚟讲，痛风啱啱好，唔应该食辣嘢嘅，不过饭堂嗰厨师整嘅辣椒酱真係好正，用嚟捞面真係一绝。
今日迟咗锻炼，结果跑咗 30 分钟就要停落嚟嘞，如果唔係冲完凉返去上班都迟到咯。呢次重新开始锻炼，感觉心率比以前高，出汗出得比以前快。虽然运动完一身汗嗰种感觉好爽，但係一定要控制好，冇搞到自己受伤，如果唔係运动嘅意义就冇咗。