畀一个同事搞到自己心烦，成个心都好似翳住翳住噉。既然我哋改变唔到人哋，唯有调整自己，减少内耗。
我唔知道大家身边有冇啲噉嘅人？总之我而家身边有一个噉样嘅同事，同佢相处时有一种一直「被消耗」嘅感觉，人总係会莫名嘅烦躁。今晚出去做嘢，出发前已经通知班大爷准备好，结果有条友一直喺度拖拖拉拉，成车人等佢一个，我唔明佢点解噉都好意思嘅。
我平时最憎人做嘢拖拉、冇时间观念，呢个可能係因为受我老豆嘅影响，咁多年我老豆做嘢都冇乜时间观念，所以细细个时我就同自己讲，「以后做嘢一定要利索啲，宁愿自己等都唔可以要人哋等自己。」
所以同呢个同事相处得耐咗之后，我一直畀佢搅到个心翳住翳住嗰度，都已经影响到自己嘅情绪同效率喇。不过都冇计，毕竟我哋改变唔到人哋，只可以自我调整。
以后尽量避免同佢有交集，至于佢平时习惯性嘅「过度提问」，以后要学识用「闭环式回应」嚟结束对话，明确传递「已经讲完」嘅信号畀佢。如果佢仲唔死心就要借机攞工作嚟转移话题，避免私人领域嘅过度纠缠。
人嘅精力係有限嘅，所以应该将其放喺重要嘅人和事上边。