因为琴晚冇带弟弟出去笃波，所以今日决定唔出去跑单，陪下两只塞豆窿。毕竟呢个国庆假期自己一得闲就出去跑单，都冇乜点陪过佢哋。囡囡去姑姑屋企野就唔讲佢啦，弟弟呢几日都係自己一个玩，阴公猪。
今日天气好鬼热啊，出面车多人多，今日行程畀弟弟嚟安排，佢话想去万达玩弹珠，空中魔网，然后饮奶茶，食完晚饭先返屋企。既然老细已经安排好嗮，噉就一一实现咯。
不过有嗰句讲嗰句，空中魔网收费有啲离谱，套票之后嘅单价仲可以接受，如果单独买两张票嘅话要百二蚊一张，认真攞命。
喺万达食完饭之后决定逛多阵消化下，行咗入去小米专柜卖场，前一排老豆讲到时妹妹新屋入伙要置办家电，老豆嘅意思係想我到时买个冰箱或者其他实用性嘅家电过去祝贺。于是就想了解到小米家电度简单了解一下，但冇谂到个服务员热情到亖，我哋又未有咁快要买，总之就係一顿拉扯。
查实我已经明确咗自己嘅谂法，呢次过嚟只係想简单了解，点知个销售又话要加微信，又话要点点点，有啲烦。