加入小队嘅第一日，唔知係因为礼拜六学生放嗮假多人点餐定係因为入咗小队嘅原因，今日接咗好多单嚟跑，一个午高峰就跑咗成旧水。虽然因为架车要充电，跑跑停停，但全日收入都有两旧水，跑咗咁耐京东，今日嘅收入係最高嘅。
晚黑继续同小广子去笃波，嚟咗间新开冇耐嘅球室，小广子要求嘅，佢应该係喺抖音上睇到广告，想嚟试下。因为我都有刷到，睇嚟呢间嘢用咗唔少钱嚟搞推广。据小广子了解到，呢间球室係肥佬朋友开嘅，投资咗七十粒。唔係传统嘅桌球室，係以饮吧加台球为主题。原本个场就唔多大，分咗一半做饮嘢嘅地方，可想而知剩低嘅地方可以摆得落几张台。大概数咗下，十张唔够，而且每张台嘅间隔非常之小，只可以话如果只係想笃波嘅话，环境认真一般。
但係呢，有得必有失，有饮吧嘅加持，成个场都吸引咗好多后生仔女，确实好旺场。就好似係我哋隔离台笃波嘅嗰对情侣，年轻、有活力，羡慕啊。尤其係嗰个靓女，「球」技又好，哈哈哈。