朝早收到一个通知，要求我哋夜班安排一个人喺重阳节嗰日去百步梯嗰度值班。讲真啦，我真係好鬼讨厌呢啲咁嘅值班。依家天气又冻，凌晨两点至七点有鬼人上去嗰度爬山咩？都唔知呢啲班值得有乜嘢意义？不过呢，人哋大Boss都一齐同我哋去值班，我哋呢啲做细嘅仲有鬼得讲咩？
因为值班要求係凌晨两点至七点，所以第一时间我就谂到叫阿龟同卓仔佢哋两个安排一下，到时过去嗰边加下班。毕竟而家佢哋係 2:00 先落班，上完班之后再过去百步梯嗰边值班咁就啱啱好啦。点知今晚上班嗰阵时同佢哋两个倾咗一下，两条契弟都唔愿意加班。我顶，平时佢哋有乜嘢要我哋帮手，我都第一时间同佢哋安排好，依家嗌吓义气加个班都喺度嫌三嫌四。既然係咁，正所谓你做初一我做十五，以后如果你哋要休息或者有乜排班要求嘅话，想要我帮手？难啰。