今日京东外卖平台完全冇乜单，中午十一点半出咗去开工，谂住跑返十张八张单。点知个大厅一直都係白板，个心瞬间好似依家嘅天气咁样，冻嗮。做咗个半钟，先跑咗五单，最后一单返咗嚟屋企个小区，于是就决定收工。
琴晚听阿梁倾咗一下，佢话京东未来会改革。而家我哋所在嘅小队到时可能会被取消，换另外一种模式生存。对于我同阿郑做众包但又加入咗小队嘅人，可能係一个致命嘅消息。
我发觉阿梁真係多嘢讲到鬼咁，平时喺度认屎认屁做算啦，一日喺度讲自己有几威水有几威水，真正愿意帮我哋又有几次啊？不过我早就对呢个人有所了解，所以依家佢有咁样嘅表现，我一啲都唔出奇。反正呢人永远都係要靠自己嘅，所以自己做好自己本分，但求无愧于心，咁就够啦。
呢两日出去跑单都有收到帮买小费，虽然唔係好多，但係都好过冇呀。而家成个外卖市场都係淡季，想话日日过百就真係要好勤力先得啰。