今日囡囡生日，我请咗假陪佢过生日。因为屋企人一直都係唔办生日嘅，所以咁耐以嚟都系简单食餐饭就算㗎啦。
下昼送完餐过万达买咗份礼物畀囡囡，之前同佢讲商场嘅时候，佢一直都好想买呢个抱枕。但当时老婆唔应承，因为囡囡朝朝起床都会打打「一朝」，都唔知系因为过敏定系冷亲？但系我觉得囡囡个小猪佩奇抱枕已经抱咗好多年，查实都应该要换一换啦，所以我就藉住佢生日，送个抱枕俾佢。
晚黑彤彤同森记都过咗嚟食饭，一齐食完饭休息咗一阵之后，就开始切蛋糕，呢个时候我先将个抱枕攞出嚟送俾囡囡。由于佢唔知道我准备咗呢份礼物俾佢，所以当佢收到份礼物嗰阵时好开心，都属于一份小小嘅惊喜。
唔经唔觉，囡囡都已经 10 岁啦，时间过得真系好快。呢段时间由于自己经常出去送外卖，感觉少咗好多时间陪佢哋两个塞豆窿，查实间有时候谂一谂，出去揾得鸡碎咁多，感觉好似得不偿失啰。唉，有头发边个想做癞痢啊？出去送外卖都系因为冇办法之中嘅办法，依家咁嘅环境，揾得几多得几多啰。