今朝一早返咗乡下整阿爷阿嬷嗰坟，因为地理佬话个坟暂时唔可以郁，所以一直都未去整好佢，话要出年先可以整，今朝返落去主要系同埋斩咗坟头嗰啲竹同除下草。
你都未话，就算我同阿爸三兄弟加埋四个人一齐整，都要整咗成两个钟先搞掂。尤其系嗰啲红火蚁，睇到都身痕。难怪之前蚁咬咗一啖就要去睇医生，实在太恐怖啦，又大只又多，听日返去拜山嗰阵时都要小心啲先得。
中午嗰阵时喺晚婶仔食饭，然之后二叔同埋联叔一齐围攻晚婶仔，叫佢平时喺村入边冇讲咁多嘢。讲者冇心，听者有意。然之后晚婶仔仲喺度死鸡撑饭盖，总之就系搞笑啦。
食完饭我就开车返咗上嚟，返到万达嗰阵时见到有张单单价唔错，就决定开机跑一下，点知一跑就跑到停唔到。我都估唔到呢一次开机，一跑就跑咗成两个几钟。不过收入都算可以，差唔多有成旧水。
傍晚喺单位开咗台电鸡返屋企，食完晚饭后返嚟上班嗰阵时叫老婆车，途中同老婆商量咗一下听朝点样返落去乡下拜山。因为天气预报话听日有大暴雨，所以我系想揸四只辘返落去嘅，但系老婆担心听日会好塞车，佢主张开摩托车返落去多啲，到时睇情况啦。