老婆征用我架摩托车算一周咯，期间我将老婆之前揸嗰架电鸡执咗一下，换咗两条轮胎、刹车皮同电池。呢次抌嗮本㗎，换咗旧三元锂电池，成两千几鸡，实在唔舍得买啲热门品牌。之前一直关注小哈呢个品牌嘅电池，但实在有啲贵，肉赤。而家选择咗赋能呢个品牌，只因有个朋友做呢个品牌，噉样嘅话售后方面相对嚟讲有保障啲。
今日带咗两只化骨龙去体验渡轮，然后顺便喺石角沙滩度玩咗一个下昼。我同老婆坐喺遮阳伞底下饮奶茶，讲真，的确几舒畅，毕竟间中有阵河风吹埋嚟，人都放松嗮。至于两只化骨龙就喺太阳底下玩沙、玩水，晒黑嗮。不过唔理佢哋咯，只要佢哋开心就得咯。
期间发生咗件事，喺沙滩经营小食奶茶嘅两个档主吵咗起身，一切皆是利益驱使，应该係相对离河边沙滩嘅档主眼红离沙滩近嘅档主生意好嘅关系吧，反正最后搞到警察叔叔嚟咗先收科。
呢段时间呢类事件睇得实在太多咯，平时经常路过嘅路口，啲流动摊贩为咗霸位置导致大打出手，尤其係一啲卖水果嘅阿姨，日日上演「退、退、退」，闹起交时手舞足动，睇到都烦。最最最衰嘅係塞嗮条路，摩托车都难过。