我发觉自己真係唔衰攞嚟衰，对上几日唔係喺熟人度买咗块锂电池嘅咩，因为我对锂电池一啲都唔了解，所以就谂住喺熟人度买稳阵啲，就算明知条友卖得贵我都选择喺佢度买，毕竟有咩售后方面嘅问题我可以随时揾佢搞掂。
原本事情就噉样顺利噉发展落去，毕竟电池我呢几日用住都好满意，事实上亦都完全满足嗮我嘅需求。但衰就衰在，呢几日抖音一直推啲锂电池视频畀我「大数据真可怕」。搞到我对锂电池开始有啲了解，越睇感觉越唔对路，感觉之前买电池畀条友水咗，然后自己竟然开始喺度内耗，服颈。查实间唔买都买咗，当时买时就预咗条友卖得贵，毕竟人哋要交租，要售后㗎，人哋都要揾食㗎。
自己而家喺度内耗真係傻梗梗嘅，其实间好多年前我就发现咗自己经常会噉样，于是自己曾经告诫过自己，买完嘢之后就唔再去关注，费事后悔导致自己一直喺度内耗。估唔到呢次仲係畀大数据击中，我谂其中原因应该係因为自己买之前对锂电池一啲都唔了解导致嘅，所以喺度再告诫一下自己，唔可以冲动消费，真係要买时亦都要买之前做下功课。
买咗个野马头盔畀老婆，而家老婆上落班一个来回成四十几公里，叫佢冇再戴嗰啲九蚊九嘅头盔，冇啲保障。我嘅观念就算唔戴全盔，至低限度都要戴个四分三盔。但老婆就係唔听，话戴个咁大嘅头盔好唔舒服，服颈。安全重要定係舒服重要？
最终我都冇佢办法，只好选啲夏盔畀佢拣，最开始我推荐两只小蜜蜂嘅，老婆又话睇起身同佢九蚊九嘅差唔多，两只小蜜蜂卖两、三百，接受唔到。于是睇咗一下野马嘅，一百二十几，老婆依然唔舍得。于是乎我就偷偷下单，直接买返嚟先，噉样就冇得佢唔舍得咯。揸摩托车头盔最最最重要的，好嘅头盔未必百分百保护好你，但机率绝对比嗰啲九蚊九嘅头盔会大好多好多。
落班时收到老婆嘅微信，今日下午学校体检，姐姐被验到近视。唉，今年姐姐话要做手工，于是攞咗台 iPad 嚟用，都怪我同老婆，后嚟冇做好监管工作。当然，姐姐近视嘅主要原因未必係因为台平板导致嘅，但事实就係姐姐过度使用平板在先，验到近视在后。呢件事错在我，之前都冇乜点带佢哋外出，好多时候都等佢哋响屋企，自自然就会睇电视或者用平板刷视频。
两年前弟弟就验到有近视，而家姐姐又有，头痛。