你所站嘅位置唔一样，你嘅世界就唔一样。以鱼观万象，方知镜由心生！
今日听一位老人家讲咗一段话，感触好深。
你站喺厨房，鱼就係食物。你站喺佛堂，鱼就係生命。你站喺市场，鱼就係商品。你站喺河边，鱼就係风景。你站喺养殖场，鱼就係投资。你站喺龙门下，鱼就係传说。鱼依然係嗰条鱼，赋予佢意义嘅从来都係你所站嘅位置。你嘅位置唔一样，你嘅世界就唔一样。以鱼观万象，方知镜由心生，所以你先会体会到乜嘢叫做「山穷水尽疑无路，柳暗花明又一村」。
身边有个装聋扮傻嘅同事，佢以为可以呃嗮冚唪唥人，平时仲要周围同人讲自己点样蛇王。因为佢平时同我一 team，相处耐咗之后发觉条友越嚟越难顶。有时候自己忍唔住多口提醒佢两句，可能就係因为呢个原因导致佢觉得我喺度教佢做人，查实间我只不过係唔想佢嘅所作所为影响到我带嘅 team 咋。如果唔係噉，我睬佢都傻。
听完老人家呢番话之后，我觉得自己以后完全冇必要为咗呢啲嘢烦恼，非亲非故，何必烦心？做好自己本分就已经足够。人，只可以活一次，冇第二次机会，所以远离负能量，保持心态，好好生活先至係最重要嘅。
今日港华燃气嘅工作人员家访做例行检查，大佬啊，我啱啱训着㗎。师傅话屋企个燃气灶已经用咗超过八年，属于超期使用，存在安全隐患。佢指咗几个地方畀我睇，的确有几个地方生咗锈。平时唔多点用嘅炉头仲要有啲渗气，虽然唔係好明显，但师傅手上嘅仪器的确有警告。
讲真，我真係啱啱先知燃气灶原来只有八年嘅保质期。早知旧年就唔鬼维修个炉头啦，而家又话超期要换，噉我之前整炉头洗咗旧几水咪白白浪费嗮？加上而家师傅都检测到有个炉头有渗气，即係唔换都唔得啦。
师傅检查完之后叫我签名，正事办完就开始向我推销。我平时冇留意燃气炉嘅价钱，所以听佢推销咗一下下我就以同老婆商量过先，然后佢留咗个电话号码就走咗。
上班时收到物业打过嚟嘅微信电话，明明有业主嘅电话号码，何解要多此一举用微信通话，难道係防止通话录音？我有呢个谂法係因为对方係电话上讲嘅事，关于车位管理费。原本业主嘅车位每个月都要交 50 蚊一个月，而家降到 33 蚊一个月，从车位交付开始计，退还相应金额。
老婆之前就向物业反映过车位管理费过高嘅问题，嗰阵时老婆喺某物业公司过渡，因此了解到好多小区嘅车位管理费都係三、四十蚊一个月。但物业当时好强硬，坚持五十一个月。今日突然间嚟咗咁样一出，真係谂都唔明。
今日发现自己张办公台好鬼乱，堆满嗮嘢。由于办公室得三个人，除咗我之外，其余两个都冇饮茶嘅习惯。搞到我之前买嗰套茶具显得特别立立乱，多出嚟嘅茶具又挜拃。于是乎我决定重新买过套茶具，一个盖碗一个杯足够，手绘嘅复古兰花。我一眼就相中呢套，花中君子，淡雅不张扬。
至于旧呢套，收到货就掟鬼咗佢。