时间完全唔够用！！！
「后生时经常谂住点样可以等时间过得快啲，噉样自己就可以做好多当期时做唔到同唔可以做嘅嘢。」
以前嘅自己竟然有啲咁鬼憨居嘅谂法，真係搞笑。而家年纪大咯，觉得时间过得好快，甚至唔够用。呢段时间自己唔係唔想记录，但实在太多嘢做，导致自己完全冇空闲时间打开电脑或者手机嚟记录生活。
工作方面，最近由于登革热、基孔肯雅热防控搞到鬼咁紧张，经常加班加点，参与咗两次大型嘅消杀行动，热到飞起。
生活方面，周末依然係陪两只化骨龙，讲起两只嘢我有时真係想做餐佢哋亖下J，反正有时候真係畀佢哋激到扎扎跳。周日同佢哋去咗广州海洋馆，人太多啦，而家噉嘅天气，海洋馆入边有空调，所以好多家长都选择带小朋友嚟，结果一扎堆，呢次出行体验直接腰斩。
游戏方面，5 号嗰日喺老任度消费咗一笔，暗黑二嘅术士 DLC，点解会选择喺老任度买 DLC 呢？主要係平时喺屋企都静唔到心玩游戏，唯有上班摸鱼时先有心机玩一下。呢两日练咗个术士，果然强势，我玩纯招，一个宝可梦就直接起飞，通刷所有地图。不过好似话下个赛季宝可梦就要被砍，好彩都爽咗一下下。
折腾方面，我有一个甲骨文 4C24G ARM 服务器，又係 5 号嗰日收到甲骨文嘅邮件，话要将免费用户嘅服务器规格从 4C24G 降到 2C12G，直接腰斩。冇计，唯有将部署喺上边嘅几个 Docker 应用迁移返屋企嘅 NAS 度。先上甲骨文官网手动将配置降低，保持免费用户。然后开始迁移应用，好彩平时我都有对呢个服务器做备份，所以好快就将几个占用资源比较大嘅应用迁移到 NAS 上。我估计甲骨文仲会出手，以后可能变成 1C6G，呢个就唔谂咯，反正自己亦都薅咗咁多年羊毛咯。除咗处理甲骨文之外仲舞咗一下群晖嘅 Docker 套件 Container Manager。讲真，我开始对呢个套件有啲反感，虽然话有个 UI 界面可以将各个容器直观噉展现出嚟，但係对于已经习惯咗命令行模式嘅人嚟讲，呢个套件反而增加咗操作难度。我选择将平时经常使用嘅服务都运行喺群晖度，一般情况下，只要容器服务能正常运行我基本都唔会选择主动升级。呢次升级主要係因为收到群晖嘅警告邮件，提示机器 CPU 资源被占满，通过 top 查询到有个 /tmp/javab 进程异常，通过追查发现呢个进程係 gitea 呢个容器嘅，具体异常原因冇继续追查，我选择直接升级。然后就顺手将其他几个运行紧嘅容器都升级咗。好亖唔亖，唔知係咪因为为咗拉镜像设置嘅代理原因，呢两日偶尔就会收到群晖嘅邮件，提示容器报错，自动重启。反正以后冇乜嘢就尽量少啲折腾，太耗时间。
外卖方面，暑假之后我喺跑外卖呢件事上整体就一个字，「懒」。冇计，两只化骨龙放假，有时间嘅话肯定係陪佢哋更加重要。尤其係进入八月之后，午高峰就只跑一趟。而且而家啲单价，狗见到都摇头。想话赚啲零花钱洗下都咁难！