一场大雨，令我睇清自己两个问题。第一，係要做选择嘅时候唔够果断；第二，係自己唔够「狼」。
落班返屋企时嚟咗场大暴雨，唔单止风大雨大，仲要行雷又闪电。讲时讲，自己一个匿喺嗰棚度避雨时都有啲心慌慌。原本自己可以入去保安室同阿伯倾下计，不过谂到自己条裤已经湿咗一半，费事整湿人哋地方。
场雨落咗半个钟度就开始慢慢变细，于是我就开始着雨衣准备开车走。但准备出发时唔知做乜鬼打开咗京东秒送，果然风浪越大鱼越贵，简单瞄咗两眼就见到几张大单，平时呢啲噉嘅单我哋众包仔边有资格睇。
讲真，我有啲心动咯。但係夜麻麻又仲落住雨，感觉有啲危险。于是我就犯咗第一个错，犹豫不决。查实间好多机会都係一闪即逝㗎，平时就係因为自己唔够果断，硬生生错失咗几次机会。虽然话每一件事情都係两睇嘅，到底好定唔好都话唔埋嘅，之但係做人嘛，该果断嘅时候就应该勇敢啲。
当我拣咗跑返几单时，我又犯咗另外一个错，唔够「狼」。当我喺度不停噉刷新个大厅拣单时，大厅曾经出现过两张大单，自己居然唔敢抢，虽然话配送距离有啲远，但一张单就三十几四十鸡，顺路擸多几张嘅话，一趟点都有七、八十啦。
最后自己唔想送太夜，就近送咗三张单就返屋企。喺返屋企途中我一直喺度谂今晚自己犯嘅错，谂下谂下又开始慢慢回忆起自己人生中几个重要嘅转折点，好似唔多唔少都有呢两个问题。不过都唔知係咪自己先入为主咗，毕竟係人都会不停噉为自己所犯嘅错揾借口㗎啦。